من منبر الحكمة ونضم التعابير = وكر الصقور الملقية بالبراعه
ابرمي السبحة طناخه وتدمير = لهل النفوس المدمجة بالدناعه
مع احترامي للوجيه المسافير = ابا اسفهل بشوت ربع الاشاعه
لا جاهم اسمي صار حسن التدابير = لا قالوا الشاعر غبنهم سماعه
اثر الغبن يذبح بحد السواطير = اثري ذبحت اقلوبهم في اذاعه
لا والله اللي قنبعت يالمعاثير = ما فيه لا رحمه ولا به شفاعه
ابخبط اغبار المشافيح ويطير = ابظهر المغبون واكشف اقناعه
ابا افصده عرقٍ يجي منه تمرير = ابكوي الملسون بسفل اخناعه
بشب ضوي في حدودي مع الغير = بحط بقلوب الحواسيد راعه
مدامه اسمي في نحركم مسامير = تبطون وانتم تشتكون الوجاعه
ما باقي ألا شلة اعوير وصوير = ترقى على كتفي بروح الجشاعه
ما همني بالوقت كثر القراقير = أطلق شنب نهديه سكت ضياعه
لو صغروني في نظرهم أنا كبير = لو حاربوني في قصيدي مناعه
أقول شاعر وافتخر يا المغابير = وعندي على ما قول قوه قناعه
يا طيب رأسي يوم اخمه بتفكير = كأنه مديرٍ لاهيٍ باجتماعه
لا غاب يضوي بالمعاني طوابير = ينقى جزيل القاف وزن وفضاعه
كنه معزب والقوافي مسايير = كان الحروف تقول سمعٍ وطاعه
يسطر أبياته على الظرف تسطير = يسبح مع الديوان حسب ابتداعه
ولا جاء نهارٍ فيه للمدح تشهير = طش الشماغ ويفتخر بالجماعه
ربعي عتيبه محتمين المظاهير = تاريخهم في نجد يا طول باعه
ذباحت الحايل زبون المناعير = لطامت العايل صقور الشجاعه
ماحسبوا بالوقت كثر المخاسير = كن الكرم خالٍ لهم با الرضاعه
ولا جاء مجال فيه وصف الغنادير = دون البراقع ما يزيد التياعه
ياصفلهن وصف البدو فن تصوير = نصفن يجي مليان وأخر مجاعه
ولا جاء مجالٍ لصداقة معايير = حايز على أول مرتبه بنطباعه
محزم خويه لو تحد المعاسير = يسوق دمه دون لفة ذراعه
وليا بداله مع رفيقه مشاوير = سده متين ولا رجاء بنقطاعه
وليا حصل من بعض الأصحاب تقصير = الأوله يدمح لها بنصياعه
وان كان كررها قليل المعاذير = اغسل اشراعه صدق اغسل اشراعه
وبعض الوجيه اتشيل كبر بتجهير = برا الوجود وبالمواقف اضباعه
ذولاك أنا احقرهم بنظرة تحاقير = مسمع عليه ولو يجي بندفاعه
يمس عمره بالحكي وانه امير = ناقص ووده يكتمل بصطناعه
ولو كان له منصب بعد خير ياطير = دون المراجل ما يزيد ارتفاعه
يا ضعيف يا فاشل ويا عاكس السير = وين أنت رايح يا رخيص البضاعه
الكبر لله ما يبيله تفاسير = وألا أنت مسكين(ن) صنعته اصناعه
تسعين لحيه عندي الله بالخير = ما كن لهم في دنيتي نصف ساعه
ماهو غرور استغفر الله ولا غير = الخط واضح طابعينه اطباعه
حبيت اكفر عن خطاهم بتكفير = بيتين للي مقتدر بستطاعه
أعيد شرحي بس من باب تذكير = لا فيه لا رحمه ولا به شفاعه
قصيده منبر الحكمه
رد: قصيده منبر الحكمه
العرض العادي
